"يا بنت امّا الفلك يدور الفلك يدور"

[أم الزهراء]

​

هذه إحدى قصص حكايات زمان
حكاتها جداتي ربي يحفظها و يطول في عمرها
فيها كل العبرة عن الاخوة و الصبر على الشدائد

​

​

"يا بنت امّا الفلك يدور الفلك يدور"

​

هاذي قصة زوج خواتات وحدة بدارها واسعها و بخيرها و اولادها و مالها و اراضيها
عايشة مع اولادها و اولادهم فالنعيم
والثانية يا حليلها مسكينة ولادها صغار و يتامى تربي فيهم
ساكنة في قربي صغير و باش تقوت وليداتها
كل يوم ترفد قبيبتها و تروح عند أختها الغنية باش تجيب شوية لبن و كسرة
تغذي بيها وليداتها اليتامى و تعشيهم بيها

كي تدخل لدار اختها و هي ميتة بالحشمة بالصح ادايتها الغبينة المخلوقة ​

تربي و تقري في اولادها
تروح اختها تقول لكناينها يفرشولها فراش ما يصلحش حتى للبعير
تقعد عليه و تسكت و تقول لاختها جيت ندي شوية لبن و كسرة للصغار
تقوللها اختها نعطيك بالصح بشرط ترقصيلي
تنوض مسكينة ترقص و تقول
"يا بنت امّا الفلك يدور الفلك يدور"
تقوللها اختها شا راكي تقولي ؟
تقوللها والو غير كلمة راني نقول فيها و خلاص
تدي اللبن و الكسرة و تروح

راحوا اعوام و جاو اعوام
و الغنية مات راجلها و تفركتو ولادها كل واحد ادا مرتو و اولادو و راح
و خلاو الارض و الغنم هملوا
وباعوا دارهم و خلاو امهم في قربي
في هذاك الوقت اليتامى اولاد المرة المغبونة كبرو و قراو
واحد طبيب واحد استاذ
كل واحد وفاش تخصص
وواحد خدم و شرا قطعة تاع ارض صغيرة
تعاونوا كامل و شراو سكنى كبيرة مع امهم
وتزوجوا و قعدوا معاها

اللي كانت غنية و بقات وحدها جاعت و تعرات و استوحدت
تفكرت اختها و تفكرت شا دارت فيها من قبل
خممت و من بعد قالت انا نروح نشوفها اذا طردنتني و لا عاملتني كيما عاملتها نستاهل
جات عند اختها لقات كناين اختها يديروا في شغلهم
جات وحدة فيهم لعجوزتها و خبرتها بلي كاين واحدة راهي عند الباب تحوس عليها و تقول انها اختها
قالتلها دخليها دخلتها
لقات اختها سلمت عليها و سقساتها و عرفت حكايتها قالتلها انا جيت ندي شوية لبن و كسرة باش نتقوت
قالتلها ادخلي

وهي و كناينها متفاهمين غير من خزرة يفهموها و تفهمهم
شافت في وحدة فيهم جات فرشت الفراش العزيز قعدت عليه اختها
وراحت جابت القهوة و كل خير معاها
شربت و قالتها ذرك انا نروح
قالتلها اختها لا اقعدي مازال الحال
راح ولدها ذبح خروف لخالتو و الكنات داروا غذا مسقم
تغذات و قالتها نروح
شدتها زادت تعشات
مور العشا قالت لاختها بغيت نسقسيك
كي كنت انت مغبونة انا كنت نخليك تقعدي على فراش موسخ و نرقصك و نضحك عليك باش نعطيك جغمة لبن
وانت ذرك ما لقيتي وين تحطيني
كي جيت كنت نستنى تطردين و لا تديريلي كيما درتلك
بالصح لقيت العكس
ونزيد نقولك حاجة هذا وين فهمت الكلمة اللي كنت ترقصي و تقوليهالي

"يا بنت امّا الفلك يدور الفلك يدور"

قالتلها شوفي اختي انت مهما درتي تبقاي اختي
و ما نخليكش في هاذ الحالة ارواحي تعيشي معايا و مع اولادي حتى تدفنيني و لا ندفنك
في الاخير قعدت مع اختها و ما نجح غير مول القلب الكبير الصبار
ان شاء الله تعجكم حكاية جداتي​

 

[اميرة على عرش الالم]

بارك الله فيك و احسن اليك قصة في قمة الروعة فعلا الصابر ينال هذا وعد ربيمشكورة متعتيني بالقصة

 

[رحاب الجزائرية]

قصة رائعة وتعبر عن التسامح
بصح لوكان انا ياو نرقصها على الشوك الشر كرات ماتقدريش تنسايه علاش يقولو دير الخير ونسات ودير الشر وتفكري ربي مايحطنا في مواقف هكذا بصح تالمون شفنا من الناس ولا التسامح يرجع ضعف ويحسبو رآنا خايفين منهم الا من رحم ربي

 

[ام محمد الجزائرية]

هي قصة مليحة بصح النهاية منقدرلهاش ، نصبر صح على الاذى بصح تولي ليا عينيها نقلعهم واذا مقلعتهمش نعطيها من فم الباب الماكلة بصح وجهي ميشوفش وجه تاعها

 

[رحاب الجزائرية]

@ام محمد الجزائرية اختي في كلشي ياو العقلية هيا هيا ههههههههه

 

[ام محمد الجزائرية]

@ام محمد الجزائرية اختي في كلشي ياو العقلية هيا هيا ههههههههه

هههههههه هاه نلعبو ولا
ديجا اسكتي برك رني نيماجيني نيماجيني في وحد لعباد هههههه

اختي الحقيقة نحبها نموت عليها ومديرهاش نعرفها بعيد الشر

 

[رحاب الجزائرية]

@ام محمد الجزائرية حتى انا اختي موحال ديرها أصلا في داها كون طيب حاجة تشتهيها تجيبلي منها وااتاني اي حاج نخليلها حقها منها ودمعتي تنزل في تعبها قلل ماتبكي هيا
بصح قصة ا زهراء والله غير كاينة ورآنا نشوف. العجب كل يوم قصة مابين الإخوة علاجال ورث ولا اولاد يتخاصمو

 

[طير الجنة]

وعليكم السلام ورحمه الله تعالى وبركاته
مشكورة اختي على القصة الرائعة
كيما قالو ناس زمان الدنيا دوارة
الصابر ينال
ربي يحفظ جداتك و يطولها في عمرها يا رب

 

[الورد الأحمر]

السلام عليكم ورحمة الله

فعلا الدنيا تدور وما تدري عزيز قوم يولي ذليل والعكس فالإنسان مليح ما يتكبر بجاهو ولا مالوا ولا يأذي شخص ولا يذل كرامتو.

مشكورة حبيبتي على القصة الله يحفظك