الحديث قياس مع ام عبد الباري

أم عبد الباري

:: حواء جديدة ::
إنضم
20 أفريل 2020
المشاركات
9
نقاط التفاعل
18
النقاط
15
#لحديث_الزين_مع_ام_عبد الباري

بسم الله ابدايت وعلى النبي صلايت ...عليه الصلاة والسلام ....لحكاية نحكوها والعبرة ندوها وعلى الله انخلوها 🤗🤗...كان راجل ساكن في قرية اصغيرا و متزوج من امرا زين ودين او اخلاق وبعد عام على ازواجهم اداوس راجلها مع بن عمو وكلمه مني و كلمه منك احظر ابليس بيناتهم ويضربو ضربة على الراس ايموت بن عمو ....حكمو اعليه اكبار لقبيله يرفد مرتو ويرحل ومايزيدش يرجع والا ارجع يموت هذي هي احكامهم من بكري ومكانش فيها نقاش ...ودع اهلو على خير وارفد مرتو وشد اطريقو ....اول قرية وصلولها قصدو شيخها والشيخ رحب بيه واعطاه بيت يسكن فيها مع مرتو .....في لقبيله كانو ارجال يتلمو ديما عند الشيخ يدرسهم وايدرسو احوال القريه واش يخص وواش لازم وووو .... واحد انهار جا الشيخ فايت من جيهة بيت الراجل ويشوف مرتو 😍وعقلو طار وقلبو اتملك وعاد لاهف اعليها ....راح للمجلس بصح عقلو كان مع لمرا ....اومرا على مرا يتلفت للراجل يخزرو ويسقسيه كاش ماخصك ماتحشمش راك عند ناسك ....وابدا يفكر كفاه ايبعد راجلها على لقبيله وهو يتلهى بلمرا 🤔هو هكاك وجاتو الفكرة وكان المجلس مليان ارجال ...قالهم يااجماعه راني اسمعت بلي لقبيلة لفلانيه راه عندهم اجمال للبيع او قالو ام صيلا ..قلت نبعث ربعه من ارجال يشوفوها ويتأكدونا من لخبر ....قالو الرجال ماعليش انروحو انشوفو خير من اراجل ربعا ومن بينهم صاحبنا راجل لمرا .....راحو ارجال بلا ماينقشو ولا يعارضو وكانت اطريق باه يوصلو الفرسان لذيك لقبيله ثلاث ايام مروح وامجي ..... وكي طاح الليل واتاكد الشيخ زين بلي قاع الناس راقدا راح لبيت لمرا لكان ناوي لغذر وكان اعلابالو مكان حتى واحد يشهد اعليه ولا يشوفو المهم دار قاع احسباتو ......شيخ ولا بطلنا 😂 المهم في البيت كانت لمرا راقدا وادخل يتسلبت في الضلمه ويخبط في اعمود البيت وايطيح على قراقب واتنوض لمرا مفزوعه 😮 واتقول اااااااشكون لي راه اهنا ؟......يجاوبها الشيخ 😶انا شيخ لقبيله لي راكم ساكنين عندو ...قاتلو لمرا .....مرحبا وواش اتحوس في هذا الوقت من ليل؟
قالها الشيخ ..يامخلوقه راني شفتك واديتيلي عقلي وقلبي املكتيه ابقيتك قريبة وليا احبيبة 😘
قاتلو ماعليش وماكانش مشكل ..بصح عندي شرط ...قالها اشرطي واتشرطي كل لي اطلبتيه ليك يحظر في الحين 🤩
قاتلو عندي لغز الا حليتو انكون معاك ووقت لي تحب ....وزادتو في لحديث قاتلو اللحم باه مايفسدش ويرجع جيفه يرشو اعليه الملح !اشكون يصلح الملح اذا افسد ؟!
واتقدر اتروح اتصول لي حبيت واذا جبت اجواب اصحيح راني ليك كما اتحب ! قالها الشيخ مايكون غير خاطرك وان شاء الله غدوا في ليل انجيك وانجيبلك الحل 😍....راح الشيخ الدارو وقلبو يرفرف ويحسب في الوقت وبات ليلتو يفكر في لغز بصح ماوصلش للحل وغير اصبح اصباح راح مجلس وين كانو ارجال يستناوه ..سلم اوريح واعقلو في لغز 🤔اشوي وينطق ويسول لكانو جالسين ويقولهم اللحم باه مايفسدش يرشو اعليه الملح والملح باه مايفسدش واش يصلحلو؟؟؟ كل واحد رد بجواب على قد فهمو واعلمو بصح الشيخ ماقنعوهش بجوابهم ....ومن بين الرجال كان راجل مولا دين و فطنه وحكمه وعلم وادب هو الوحيد لي ماتكلمش قاع ....اشوي واخرجو الرجال غير هو لماخرجش واقعد امريح ...قالو الشيخ بازعاف انت اتقول ماجوبتش على سوألي زعما انت الفاهم فيهم ! قالو الراجل كنت باقي انجاوبك اوحدنا وبلا مايسمعنا واحد ...قالو حقيقة اللغز هو بيت من الشعر قالو ابو سفيان الثوري وكان قاصد بيه ناس العلم وناس الدين ...وهو في الحقيقة يقول ...يارجال العلم ياملح البلد **من يصلح الملح اذا الملح فسد !؟
واذا ماكذبتش راك روحت لمرا مولات اعقل وعلم وادين وبنت اصول باغي تغذر بيها ..وهي ابغات اتبعدك بلا ماتفضحك ..وابقات تكسبك كما الخو وماتزيدش عدو لاهلها بمقامك واقدرك ..واتصون زوجها في اغيابو او حضرتو ...وهذا اعلاه قالت ليك واش قالت باه تعرف انت واحنا انفيقو تاني من غفلتنا 😓او قصدها ارجال لبلاد الا فسدو اشكون الي يصلحهم ؟؟ ياك الشيخ لي هو الملح .....واشيخ الا افسد اشكون يصلحو 😔؟
يا شيوخ العُرب يا ملح البلد من يُصلِحُ الملحَ إذا الملحُ فسد ؟!
واهنا اتفطن الشيخ واش دار وواش كان رايح ايدير واستغفر الله واحشم من روحو واهبط راسو من عيبو لكبير واندم اندامه اكبيرا على واش كان داير من افساد وافعايل من اقبل...وقال للراجل راك اكويت القلب يامولا لعقل والدين ..استر اعليا سترك ربي في الدنيا والاخرة ونطلب منك وقت لي شفتني اغلطت ماتوخرش بخطوا باه تنبهني ...واحنا ياحرير انقولو قاع لينا زلات واخطاء بصح اتككينا بروحنا ولا والو استغفرنا وارجعنا ولا كملنا ياما ناس مسؤولة وديرا خدمتها طريق لمبتغيات واهداف شينة وارخيصة ياما ابنات وانسا اتسومت في شرفها ويما ابات وارجال اتهانت على خبزة اولادها ويما بيوت اتهدت بسباب ارخاص ولا ارخيصات كما قالو ناس ازمان النسا ثلاثة انواع كاين لي تصنع راجل وكاين لي اضيع راجل وكاين لوحدها بالف راجل وقالو كاين الغالي وكاين ارخيس وكاين لي زيرو وكاين الديس وكاين ملايكة وكاين ابليس ولي بمشي بالحيله طريقو عمروها ماتكون اطويلة واهنا كملت ام عبد الباري حكاية اليوم وربي يسترنا ويهدينا وايفيقنا بعيوبنا ولا يكشف اعلينا ستر ويستر ابنياتنا واولادنا ويبعد اعليهم لبلا وتصبحو بخير ياوجوه الخير 😘😘😘
 
آخر تعديل:

بلوغ المرام

:: حواء جديدة ::
إنضم
1 سبتمبر 2020
المشاركات
6
نقاط التفاعل
7
النقاط
15
السلام عليكم و رحمه الله تعالى وبركاته. ام عبد الباري تبارك الله فيك حديث قياس بصح ومعاني للي حاب يتنصح معرفة خير انشاء الله معاك اختك بلوغ المرام تصبح بالف خير.
 

رحاب الجزائرية

:: مشرفة ::
إنضم
1 أوت 2019
المشاركات
676
نقاط التفاعل
2,087
النقاط
86
كلامك درر ام عبد الباري متشوقة للمزيد وبارك الله فيك اخيتي
 
Top